ჯანდაცვის მინისტრს დღეს, 16 იანვარს საქართველოს მესამე პრეზიდენტის შესახებ ჰკითხეს. მედიის წარმომადგენლებს აინტერესებდათ, ეთანხმება თუ არა მინისტრი „ქართული ოცნების“ გუნდის წევრების განცხადებებს, რომ მიხეილ სააკაშვილის ჯანმრთელობის მდგომარეობა მძიმე არ არის და თითქოს ადგილი აქვს მისი მხრიდან სიმულაციას.
ზურაბ აზარაშვილმა თავდაპირველად განაცხადა, რომ მას არ ჰქონდა ინფორმაცია მიხეილ სააკაშვილის ჯანმრთელობის მდგომარეობასთან დაკავშირებით.
შემდეგ კი დაამატა, რომ არ ჰქონდა ბოლო ორი დღის განმავლობაში ჯანმრთელობის მდგომარეობის შესახებ ინფორმაცია, ბოლოს კი თქვა, რომ გუშინწინდელი ინფორმაციით, ქვეყნის მესამე პრეზიდენტის ჯანმრთელობის მდგომარეობა იგივეა, რაც მანამდე იყო.
მინისტრმა ასევე დასძინა, რომ მას მიხეილ სააკაშვილის სანახავად მისვლის გადაწყვეტილება არ მიუღია.
